BAP - Ens em Vertraue songtext (lyrics)

Oh nä, ich will nit dinge Hofnarr sinn
Dä op Kommando Wetzjer bringk
Dä, wenn de met de Finger schnipps, pariert
Dä, wenn du et wills, de Sau russlööt
Nur vorzensierte Froore frööt
Un dä sich nur op Knoppdruck echauffiert
Dä de dir op Abruf projrammiers
En dä de dich drinprojeziers
Wenn hä ahn dinger Stell e’ Lepp riskiert
All die unjeschrivvne Leeder
Övver dich un mich un jeder
Met un ohne un met ärsch vill Fantasie
Zwei, drei liejen ald em Kopp praat
Paar verenden enn ’ner Schublaad
Widder andre schriev ich
Höchstwahrscheinlich nie
Zojejevve, paar verjess ich
Doch kei Lied ess unersetzlich
Jott sei Dank, kann ich nur saare
Dat däät wieh

Ob ich nu jetz kreativ benn
Oder manisch aggressiv benn
Subversiv oder janz einfach nur banal
Dat ich su vill negativ sinn
Kann sinn, weil ich primitiv benn –
Ehrlich, mir ess dat persönlich scheißejal
Un och, ob jetz einer Krimsekt drink
Oder nur noh Wermut stink
Ess ahn der Pissrinn spätestens
Ejal – scheißejal, wa, schmal?!

Et jitt Saache, die mich fäädisch maache
Saache, wo ich drövver laache
Saache, wo ich Spaß hann un trotzdäm
Mich nur insjeheim draan freue kann
Uss Angs, et köhm treck einer ahn
Un stochert drin eröm noh ’nem Problem
Die zem Laache enn dä Keller jonn
Die kann ich nit nur nit verstonn
Die deue mir erheblich op et Heenz

Weder öm ze protestiere
Noch zem interpretiert weede
Sing ich dir dat, wat ich opjeschrivve hann
Maximal zom Ussprobiere
Vielleich öm ze irritiere
Ich hoff wirklich, dat de dat bejriefe kanns
Die mich nur bei schönem Wedder wolle
Die kann ruhig der Deuvel holle
Falls dä die tatsächlich bruuche kann
– ävver nur dann!

Ich will öm keine Preis dä Hofnarr sinn
Dä jääjen Bares Schwachsinn singk
Och wemmer ihm dann kräftig applaudiert
Dä sich ald lang selvs nur noch "Judas" nennt
Un insjeheim dä Zick nohflennt
En der e’ sich vüürm Speejel nit jeniert
Oh nä, su will ich kein Sekund verschwende
Kein Loss, esu affzeende –
Nit met mir, ich benn nit intressiert!
Nit met mir