BAP - Fuhl ahm Strand songtext (lyrics)

Lieje fuhl ahm Strand röm
Hühr die Welle un ich spill mem Sand
Loss en durch de Finger rinne
Un denk ahn Lück, die ich ens kannt
Lück, die mir ens wichtig wohre
Die ich jähn gehatt
Och ahn die, die lästig wohre
Nur dat hann ich dänne leider nie jesaat
Met dä Welle vun dä Brandung
Falle mir die Name en
Och Jeseechter, die ahnscheinend
Noch nit janz verjesse sinn
Paar dovun nur schummrig
Su wie durch Nebel sinn ich die
Andere kloor un deutlich
Et jitt Minsche, die verjisste nie

Övverhaup Jeföhle
Dunkeljrau bess strahlend bunt
Ich denk ahn jet wie Liebe
Un ahn manch jähn verschenkte Stund
Noh langer Zick fällt mir sujar
Mieh Vorbild widder en:
"Hey, Vorbild, dank dir schön
Ich jläuv, ich kriej et langsam selver hin"

Wer ich do em Einzelne meine
Dat jeht üch jar nix ahn
Ich künnt jetzt laut die Name singe
Doch dat jevv ich draan
Denn et jitt nix affzerechne
Nohkaate jilt nit un usserdäm, wat soll dat?
Lück enn de Pooz ze hänge, bringk mir nix

Zom Beispiel dä, dä wirklich vüürhatt
Nur hä selvs ze sinn
Andre noh der Muhl ze schwaade
Dat wohr für ihn nit drin
Dä wohr domohls einer
Dä de Schnüss nit hahle däät –
"Dat wohren doch nur Kindereie"
Ess alles, wat e’ hück dozo noch säät

Wahrscheinlich sinn en Hääd Lück
Jetzt janz anders als jeplant
Un hann dä jrooße Schwenk jemaat
Öm hundertaachzich Jraad
Wenn ich manche widdersööch
Ich jläuv, do feel ich öm
Doot mir dä Jefalle, Lück
Un blieht, wo ihr sitt, ich bitte schön!