Köster , Hocker - Heiß in d'r Stadt songtext (lyrics)

Et es heiss en d'r Stadt
Unger jedem Auto litt ene Hungk
Et es heiss en d'r Stadt
Et Leidungswasser es brung

D'r Seiwer löuf mer op et Kiesbrüütche
Un d'r Blasentee beim Drinke us
D'r Steen erus do kenn sich noch einer us

Un de Fleeje klääven em Obs
Un minge Mops un de Katze
Sin sich em Keller jäjesiggich am bewedele
Et es heiss en d'r Stadt unerbärmlich heiss
Et es heiss en d'r Stadt
Unger jedem Auto litt ene Hungk

Un d'r Bioyoghurt gerinnt em Müsli
Jetreideflöckche weede welk
Jo et es e Massaker he bei uns

Et es ävver och heiss en d'r Stadt
Et es esu heiss en d'r Stadt
Et wor noch nie esu heiss
En d'r Stadt wie dismol

Jott loss et doch e besje rääne
Paar läppche Dröppche nur
Su wie do bovve do bei dänne Däne
Nu bes doch nit esu stur
Ich jläuv ich muss zesammebreche
Ich nehme an vor lauter Schwäche
Weil et es heiss en d'r Stadt esu heiss

Et es heiss en d'r Stadt
Et Leidungswasser es wie jesaat brung
Et es heiss en d'r Stadt
Ja dat sin jo utopische Temperature
Sujar de Lätta läuf övver et Smörebröd
Sudat dat Smörebröd sich
Eijentlich beschwere mööt
Ävver et es zu heiss

Un ich bin am erwäje quasi
En Erwäjung am trecke
Wahrhaftich en koote Botz anzetrecke
Met Sandale en aller Öffentlichkeit

Un die Hausmacher Levverwoosch bühlt
Sich vür Doosch
Saftich blubbernd us d'r Dos erus
Och et Zeitungswesen es am Ende
D'r Spochtteil es verdocht weil
Prinz Poldi inkognito me'm Isoldi
Sieh Süppche em Sommerloch koch

Et es ävver och heiss en d'r Stadt
Et es esu heiss en d'r Stadt
Ich mein et wor noch nie esu
Heiss en d'r Stadt wie dismol

Ich mein et künnt doch ens e besje rääne
Ne klitzekleine Schauer nur
Ich bin beim Nohdenke bereit's am jähne
Do nötz mer och kei Abitur
Ich jläuv ich muss zesammebreche
Et jitt och nix mieh zu bespreche
Weil et es heiss en d'r Stadt esu heiss
Janix läuf keiner käuf
Ja dat hät dä Schröder jetz dovun
Die künnten doch dä Schatte vermeede
Weltweit
Do sollen se doch die Arbeit'slose drahndunn
Dat die do die Jebühre endrieve
Schattenkabinett hä hä wo es minge Möpp?
Wotan! Wotan!? Ja do kumm ens bei d'r Papa
Ja su es brav bah du stinks!
Et es ävver och heiss fass schon wärrem
Öm nit ze sare schwül