Niedeckens BAP - Huh die Jläser, huh die Tasse songtext (lyrics)

Mer drinke hück ens op die Joode
Op die Lück, die och für andere do sinn
Die nit draan denke, zo verzaare
Un selver ihre eij'ne Püngel draare
Op dä Notarzt un dä Altenpfleger
Op die Schwester un dä Krankewaarefahrer
Un die staatse Kääls vun der Feuerwehr
Lück, die sich öm Asylante kömmre
Ehrenamtlich, ohne jrooß zo kühme
Obdachlose 'm Winter Decke bringe
Un en wärme Zupp zom Övverlevve

Huh die Jläser, huh die Tasse
Op die Lück, die enn kei Schema passe
Ihr sitt die Coolste 'm janze Land
Jott sei Dank!

Kumm mer drinke op die Joode
Op die Pänz met dämm längere Odem
Die sich nit enn et Bockshorn jaare lohße
Un für die Zukunft sujar op de Strooß jonn
Op all die, die sich nit verbieje
Em Minenfeld zwesche Wahrheit un Lüje
Zwesche Frustration un Nächstenliebe
Hann dä Planet nur ussjeliehnt
Doch manchem fällt et schwer, dat ennzosinn
He dat Leed, dat ess für üch Lück
Joot zo wisse, dat et Lück wie üch jitt

Huh die Jläser, huh die Tasse
Op die Lück, die enn kei Schema passe
Ihr sitt die Coolste 'm janze Land
Jott sei Dank!

Lommer einfach fröhlich blieve, lommer fiere
Bloß nit dä Humor verliere

Huh die Jläser, huh die Tasse
Op die Lück, die enn kei Schema passe
Ihr sitt die Coolste 'm janze Land
Jott sei Dank! Huh die Jläser, huh die Tasse
Op die Lück, die enn kei Schema passe
Ihr sitt die Coolste 'm janze Land
Un mir sinn fruh, dat mir üch hann