Francesco Guccini - La Ziatta testo (lyrics)

A la desterà al veint con un colp al persian
L'è acsè lèrgh al sòo let
E i linzòo fradd e grand
Tòt dò i oc' mez e srèe zercherà n'ètra man
Sèinza catèr nisun come aièr, come edman
Al so stèr da per lèe
L'è un sò amigh da tant'an
Ch'a l' ch'gnass tòtt i sòo quèl
Fin al pighi dla man la scultarà al gnulèr
D'un gat vec' e castrèe
Ch'a gh' dòrm inzèmma a i znoc
D'invèren tòtt al dè un breviari apugièe
In vatta a la tulatta
E un gaz d'acqua trincèe
Quand a s'lèva la żiatta

Un spec' vec' e incrinèe a gh'arcurdarà pian
Come al tiemp l'è pasèe
Come in vulèe via i an e gl'insaggni dl'etèe
Per al stridi i s' sèn pèrs
Quanti rughi ch'a gh'è
E i oc' come i èn divèrs
L'a gh' butarà un suris la purtinèra ed ca'
Per l'urgói cg' a gh'la lèe
Perché a gh' fa bèin i fat
Tòtt i dè fèr l'istass ciapèr al filibùs
Per badèr ai tragatt d'un avuchèe nèe stóff
Cun al quèl an andrèe
L'aviva fat la "stratta"
Ma tant tèimp l'è pasèe
Ch'a n s'arcorda la żiatta

Lèe ch'l'ha sèimpr in piò un piat
Quand ariva Nadèl lèe ch'la 'n vòl mai nisun
Se un dè, a chès, l'a s' sèint mèl
Lèe ch'l'a 'n gh'ha gnanca un fióo
Sol quall ed sóo fradel
Lèe ch'l dis: "L'a 'n va mel!"
Ch'l'a dis: "A fagh tant bè!"
E la dmanga del Pèlmi
La cumprarà a sòo anvod
Un bel ram longh d'uliv
E un pèr ed calzatt nóv
E po' in cesa tótt dóo i faran come al pret
E i pregherai Gesó ch'a l'va a Gerusalem
Po' a gh' darà soquant franch
De mattr'ind 'na casatta
Perché a s' dèv risparmièr
Com la fa lèe, żiatta