The Piano Has Been Drinking - Nachtgedanken songtext (lyrics)

Se hät et nit leich
Wie se stiefstaats erenkütt
Un verjeblich Applaus für
Ihr Zahnping erheisch

Besser wie arbeide jonn
Säät dä Thomas bezahlt un es us d'r Düür

Do mussde met Schabau spöle
Erklärt Ignazius un jeht für klein Mädche
Du häs he noch ene Deckel
Tönt dä Weet un kratz sich
Ene smogjäle Pickel bloodich

Des kenn i
Schwätz dä Österreicher un wink aff

Un sei luurt alle 10 Minutte op ihr Swatch
Und waat op dä Drogentherapeut dä sieh
Diplom en Ibiza jemaat hät
Weil dä versteht jet vun Zahnping


Nä se hät et nit leich

Se hät et nit leich
Wie se stiefstaats erenkütt
Un verjeblich Applaus für
Ihr Darmjripp erheisch

Dat jeht op mich säät dä Weet un läät ihr en
Jröne Banan op de Thek

Do mussde met Schabau spöle
Erklärt Ignazius un lies prophylaktisch
De Zeidung vun jestern

Dä Thomas es en Jedanke bei
Singer eijene Seuche em Backgammon

Dös is a Malaria
Diagnostiziert dä Österreicher un lööss
Hätzensjoot eine fleeje
Express! Stadtanzeiger!
Blöök da Expressmann un frööt it ob
Die Zahnping dann schon besser wöre

Dä Drogentherapeut es hoffnungslos breit un
Jrins en de Ewigkeit

Un sei luurt alle 5 Minutte op
Ihr Swatch un waat op dä
Regieassistent vum Hennesje Theater
Dä mem Späumanes
Per du es weil dä versteht jet vun Darmjripp
Nä se hät et nit leich

Se hätt et nit leich
Wie se stiefstaats erenkütt
Un verjeblich Applaus für
Ihr Schwangerschaff erheisch

Wä wor dat
Stammelt dä Weet un määt de Musik us

Wie alt soll et dann weede
Frööt dä Thomas un versichert jlaubwürdich
Ich frore jo nur

Dä Drogentherapeut es vill ze breit
Öm sich en su e
Sensibel Thema ahnjemesse enzebringe

Express! Stadtanzeiger!
Blöök dä Expressmann un frööt it op
Die Darmjripp dann jetz besser wör
Jadoleckmijjandertäsch
Knüttert dä Regieassistent vum
Hennesje Theater contra Re verlore
Un schriev sich 96 Miese ahn

Do mussde met Schabau spöle
Erklärt Ignazius un jeht op dä Abort

Wie sois denn häässen
Fragt der Österreicher ohne vun
Singem Kreuzworträtsel opzeluure

Un sei luurt alle 3 Minutte op ihr Swatch
Un waat op dä Kameramann vum WDR dä se ens
Janz jross erusbringe wollt weil dä
Versteht jet vun Schwangerschaff
Nä se hät et nit leich

Se hätt et nit leich
Wie se stiefstaats erenkütt
Un verjeblich Applaus für
Ihr Depressione erheisch

Wat sin dann Depressione?
Frööt Ignazius un bestellt sich ene Schabau

En dingem Alter
Säät dä Regiesassistent vum Hennesje Theater
Do hatte mer kein Zick für su jet

Ja lommer jet laache
Säät dä Thomas un raaf sich
Singe Jewinn usem Spillautomat

Du kanns hück ene Deckel maache
Säät dä Weet un jitt ihr ne offene Piccolo

Dös is wahrscheinlich hundert
Prozent psychosomatisch
Glaubt der Österreicher un
Kritt ene Asthmaanfall

Dä Drogentherapeut es hück manisch
Kreativ un rührt
Bejeistert met ener Salzstang
En singem Kölsch

Ausziehen! Schreit dä Kameramann vum WDR
Un laach sich kapott

Express! Stadtanzeiger!
Blöök dä Expressmann un frööt it op
Dä Klein dann schon loufe künnt

Un sei luurt alle Nas lang op ihr Swatch
Un waat op ihr Fröndin
Die ne Lichterkettenzubehörcenter
En Cottbus opmaache will weil die
Versteht jet vun Depressione
Nä se hät et nict leich

Se hät et nit leich wie se
En Sack un Asche erenkütt un ihr nix fählt
Un ihr nix fählt un keiner säät jet
Keiner säät jet keiner

Nä se hät et nit leich